O presidente da Xunta de Galicia, Alberto Núñez Feijóo, anunciou o venres, 29 de maio, na rolda de prensa posterior ao Consello de Goberno, que os centros de atención a persoas con discapacidade, sexan centros de día ou de carácter ocupacional, non abrirán ata setembro. Feijóo atribuíu esta decisión á "imposibilidade de garantir a distancia física necesaria" nos centros.

 

FEGADACE e as súas asociacións levan semanas traballando nun Plan de Continxencia para un retorno seguro á actividade presencial, dada a importancia crucial de retomar canto antes os programas de atención e rehabilitación para evitar o deterioro das capacidades das persoas con dano cerebral e a sobrecarga das familias, o que é incompatible coa decisión adoptada pola Xunta.

 

Tanto a Federación como as súas cinco asociacións agardamos ter unha información máis precisa e directa do goberno autonómico para anunciar á maior brevidade medidas máis concretas sobre o retorno á actividade.