A Federación Galega de Dano Cerebral está a traballar nun proceso interno de transformación dixital orientado a mellorar a cultura organizacional, a comunicación e o traballo colaborativo para, en última instancia, aumentar o impacto e a eficiencia dos servizos que o movemento asociativo presta ás persoas con DCA e as súas familias.

 

A operación, iniciada en xuño de 2022, estase a executar segundo os estándares marcados pola metodoloxía de diagnose, formación e acompañamento para entidades sociais da Fundación Esplai, especializada no apoderamento cidadá mediante o traballo en rede, a acción socioeducativa e a inclusión no eido das TIC.

 

O traballo guiado por esta organización nos últimos meses no marco do programa DigitalizaONG, deu lugar á planificación estratéxica dixital de FEGADACE e das cinco entidades que a integran sobre a base de cadanseu informe de diagnose de madurez dixital, dos que xurdiron catro plans de transformación dixital, así como da capacitación en competencias dixitais dos equipos profesionais.

Un dos principais resultados do proceso é a elaboración do plan de transformación dixital da Federación (PTD), cuxa execución está prevista para o período 2023-2024. O documento establece como obxectivo estratéxico aumentar o impacto e a eficiencia dos servizos e procesos levados a cabo por FEGADACE mediante a implantación de solucións dixitais. A partir deste eixe central despréganse catro metas operativas noutras tantas áreas de acción:

 

Con esta folla de ruta, FEGADACE intensifica o proceso de dixitalización no que estaba inmerso o movemento asociativo do dano cerebral cando a pandemia do coronavirus obrigou a acelerar o paso. Entón, o proxecto Stop Fenda Dixital foi unha das respostas de urxencia dadas e tamén unha primeira reflexión e sistematización de medidas a adoptar ao redor de obxectivos definidos e con medidores de desempeño.

 

A partir das aprendizaxes extraídas do seu desenvolvemento, o PTD xorde como unha estratexia global para un desenvolvemento dixital e tecnolóxico totalmente aliñado coas prioridades do colectivo e da organización que representa FEGADACE. A execución concreta do PTD estase a vehicular a través do Plan Operativo Dixital, que será revisado o ano que vén para reformular as actuacións que non se puideran realizar. Nel establécese, ademais dunha periodización das accións, o grao de primacía na aplicación.

 

Así, considéranse accións de alta prioridade, en primeiro lugar, as basais e/ou de infraestrutura dixital, que condicionan o ulterior desenvolvemento da actividade da Federación, como a implantación dun sistema de planificación de recursos empresariais, a mellora das conexións e o traslado do servizo de almacenamento á nube de Microsoft 365. Igualmente, tamén se catalogan como de alta prioridade as accións que implican o aumento da visibilidade online dos servizos prestados por FEGADACE e que se desenvolven a través de dúas liñas: a actualización e mellora de posicionamento da páxina web e a o desenvolvemento dunha estratexia que potencie a difusión e o alcance a través de redes sociais.