© FEGADACE | 06/04/2020 | Fragmento da portada da Memoria 2019 de FEGADACE
FEGADACE presenta a súa memoria de actividades do ano 2019
Este documento resumo do pasado ano pode descargarse no apartado de transparencia da web.
A finais do mes de marzo foi aprobada a Memoria que resume as actividades desenvolvidas por FEGADACE no ano 2019 e as contas que permitiron a realización das mesmas. A publicación da memoria forma parte da política de transparencia da Federación Galega de Dano Cerebral e pretende achegar a toda a poboación as accións desenvolvidas cos fondos recibidos tanto de entidades públicas como privadas, así como dos fondos propios da entidade. O documento, que xa pode descargarse no apartado de 'Transparencia' da web, déixanos unha serie de datos de interese que imos a resumir nas seguintes liñas:
1. Aumento do número de persoas socias e de profesionais
As asociacións que forman parte de FEGADACE ampliaron o seu número de socios neste ano 2019 en máis de 150 persoas, chegando a 1.893. Así mesmo, o número de profesionais superou a barreira dos cen, e situouse nas 118 persoas que traballan para mellorar a vida das 1.383 persoas con dano cerebral adquirido atendidas nas entidades.
2 Convenio coa Consellería de Política Social
A Consellería de Política Social co seu apoio a través do convenio nominativo permite que as entidades de dano cerebral galegas presten servizos para persoas con dano cerebral e as súas familias que se engloban en catro áreas: actividades básicas da vida diaria; mellora e benestar físico; lecer e inclusión; e información e orientación. No primeiro dos servizos, atendéronse a un total de 1.288 persoas co obxectivo de fortalecer a súa autonomía persoal.
3. Programas financiados coa asignación do IRPF
As axudas recibidas con cargo á asignación tributaria do 0,7% do IRPF, e que son xestionadas pola Consellería de Política Social, facilitaron a posta en marcha de actividades para mellorar a autonomía persoal e a inclusión social das persoas con DCA e o desenvolvemento do programa de información e apoio ás familias, que atendeu a máis de 1.300 persoas.
4. Charlas nos concellos rurais de Galicia
Grazas á subvención con cargo á asignación tributaria do 0,7% do IRPF e da doazón realizada pola Obra Social Caixabank, FEGADACE desenvolveu no ano 2019 un proxecto de charlas sobre o dano cerebral adquirido nun total de 56 concellos máis rurais e máis envellecidos da xeografía galega, cunha asistencia total de 890 persoas.
5. Monetización do Valor Social de FEGADACE
Durante o ano 2019, FEGADACE traballou na medición do impacto económico e social dos servizos de atención ao DCA das asociacións e da federación, nun proxecto apoiado pola Fundación Barrié e a Fundación Roviralta. As conclusións deste estudo do retorno social está dispoñible na nosa páxina web.
6. Máis de 100 profesionais formándose na Xornada do DCA
A Xornada sobre o DCA, á que asistiron 114 persoas, abordou a información e a toma de decisións desde a perspectiva da ética e galardonou co Premio FEGADACE-Miguel Blanco á Unidade de Odontoloxía para Pacientes con Necesidades Especiais da USC.
7. Cine e fotografía para achegar o dano cerebral
En 2019 a exposición de imaxes sobre o DCA 'Punto e Seguido' continuou percorrendo as principais cidades de Galicia, coa súa presenza en Vigo, Lugo, Santiago e Ourense. Ademais, a federación desenvolveu un ciclo de cine sobre esta discapacidade na Coruña e Santiago coa proxección de tres películas que abordan o dano cerebral desde difentes perspectivas e que contou coa asistencia de 187 persoas.
8. Curtametraxe para visibilizar as causas e consecuencias do DCA
A finais do ano 2019 a federación publicou a curtametraxe de animación 'O mundo púxose ao revés. Historias do dano cerebral adquirido', realizado polo ilustrador Miguel Gallardo e que trata de poñer en relación as causas desta discapacidade coas súas consecuencias, e que está dispoñible na canle de Youtube de FEGADACE.
9. Día do Dano Cerebral
As conmemoracións do Día do Dano Cerebral, o 26 de outubro, e do Día do Ictus, o 29, tiveron un total de 47 impactos en medios de comunicación. A federación difundiu as actividades programas polas cinco asociacións e participou no acto principal de Sarela.
10. Encontro de profesionais do movemento asociativo
77 profesionais das cinco entidades que compoñen FEGADACE formáronse en ética aplicada á intervención e nos Sistemas Alternativos e Aumentativos de Comunicación, nunha nova edición deste encontro que anualmente organiza a federación.
