Proxección da película 'Campeones' para as persoas usuarias de Renacer
Actividade incluída no programa de lecer da asociación de dano cerebral de Ourense.
O cine é unha das actividades máis demandadas polas persoas usuarias da asociación de DCA de Ourense, Renacer. Por iso, dentro do programa de lecer da entidade, a semana pasada tiveron a oportunidade de ver a película Campeones, de Javier Fesser (2018).
Campeones é unha comedia na que a igualdade de dereitos e oportunidades é protagonista grazas á lección que un grupo de persoas con discapacidade intelectual ensinan ao protagonista. Este é un adestrador de baloncesto que se ve obrigado a realizar un servizo comunitario consistente en facerse cargo do equipo 'Los amigos', integrado por persoas con diferentes discapacidades. O que comeza con desgusto por parte do adestrador, convértese ao longo da trama nunha historia de aprendizaxe na que son os membros do equipo quen aleccionan en humanidade e respecto ao protagonista.
O éxito do filme fixo que fora escollido como representante de España nos premios Oscar 2019, na categoría de película de fala non inglesa.
Os usuarios e usuarias de Renacer gozaron da proxección no Salón de Actos do CIS Aixiña (onde a asociación ten a súa sede) na tarde do 12 de setembro. O programa de lecer, no que se integra a actividade, está destinado a favorecer a inclusión social e a igualdade de acceso e oportunidades das persoas con DCA de Ourense.