A Xunta de Galicia anunciou onte -publicamente e en reunión mantida coas entidades de discapacidade- que autorizará a reapertura dos centros de día e ocupacionais a partir do 15 de xullo.

 

Os requisitos para a reapertura son tres: a formación específica en COVID-19 do persoal técnico dos centros, a dotación de medidas e equipos de seguridade, e contar cun protocolo específico aprobado pola correspondente área sanitaria.

 

As asociacións de dano cerebral, e de discapacidade en xeral, viñan reclamando a reapertura desde que o 29 de maio a Xunta anunciou que non permitiría que se retomara a actividade ata setembro. Unha semana máis tarde o goberno autonómico cambiaba o seu criterio para autorizar a prestación de terapias individuais nos centros ou a domicilio.

 

FEGADACE e as súas asociacións levan semanas preparadas, aprovisionándose de EPIs e co persoal formado. Tralo anuncio de onte iniciarion os trámites con cadansúa área sanitaria para poder dar resposta canto antes á "emerxencia terapéutica e social" na que se atopan as persoas con dano cerebral e as súas familias.