O servizo de Educación Social de DCA Ourense organiza diferentes obradoiros grupais; entre eles, un de carpintería. Cada xoves, en horario de mañá, un grupo de seis persoas usuarias participa nesta actividade ocupacional que conta con dúas liñas de traballo:

- Restauración: Dándolle unha segunda vida a artigos que xa non empregan.
- Creación de produtos: Nesta modalidade parten da materia prima para crear obxcetos útiles ou de decoración como xogos de mesa, colgachaves ou marquetería.

Con este grupo preténdese satisfacer as necesidades ocupacionais e sociais das persoas participantes, elixindo de maneira grupal os proxectos en base aos seus intereses, habilidades e coñecementos; fomentando o traballo e a cohesión de grupo.

De maneira transversal, foméntase o compromiso, o coidado dos materiais e a orde no espazo de traballo, así como a precisión, coordinación e a motricidade fina. Por último, apóstase pola reciclaxe tentando así reducir o uso de nova materia prima.