Repositorio de experiencias
Toño Núñez
"Dúbidas"
15/04/2019
"
A avoa sempre me di que Deus é marabilloso, que é o Creador. E o papá sempre desfacendo da avoa:
-Non fagas caso, Nena, eses sonche contos de vellas.
-E, logo, quen creou o mundo, papá?
-Ai… iso non cho sei, miña filla; iso non cho saben nin os sabios, para canto máis eu, que só sei ir ao peixe...
-Pois a avoa dime que temos que ser coma Deus…
-Segundo a avoa, Deus creou a natureza, os animais, as persoas…
-Si.
-Logo, foi ben inxusto…
-Como dis iso, papá? Por que?
-A ti paréceche ben que haxa nenas ou nenos que nazan sen poder camiñar, ou falar, ver, oír… ou moi enfermos? Nenas ou nenos que nacen en palacios e outros en chabolas? Nenas ou nenos moi intelixentes, ou moi fermosos, e outros coas capacidades físicas ou psíquicas moi diminuídas? Paréceche xusto, Nena?
-Iso non…
-Paréceche xusto que haxa nenas ou nenos que non coñecen a seus pais, nenas ou nenos que morren nas guerras ou a consecuencia de enfermidades que se poderían curar cunha vacina moi barata?
-Non, iso non…
-Paréceche ben que haxa países en que as persoas tiran a comida ao lixo e outros nos que as persoas morren coa fame?
-Non, papá, como me vai parecer ben iso?
-Pois dille á avoa que se Deus creou un mundo tan inxusto, non debía ser tan bo…
-Pero a avoa di que iso é culpa dos homes…
-Pitas serán, pero úleme a can…
-Boh… que queres dicir, papá?
-Que non entendo moi ben como todas as cousas boas son obra de Deus e as malas son culpa das persoas…
-Será porque son malas…
-A ti paréceche que a mamá era mala e que lle deu o ictus por iso?
-Non, papá, a mamá era moi boa…
"
Arquivado en:
Colaboradores/as