Unha vida salvada merece ser vivida
con dignidade

Repositorio de experiencias

María Canosa

"Iván"

02/04/2019

"


Chámase Iván. Ten o pelo louro coma o sol e os ollos azuis coma o mar. Hai anos que o vexo moitos domingos pola feira, sempre ao pé da súa nai, do seu irmán. Case sempre cun medio sorriso nos beizos. Un sorriso que non é capaz de estirar por completo, coma se lle quedasen prendidos os pregues da pel. Coma se algo fallase e non lle permitise sorrir con plenitude.

Foi alumno de miña nai. Alumno especial. Alumno entre aspas. Un alumno co que celebrar cada avance, cada paso, cada palabra. Porque Iván non pode falar con normalidade. Non pode camiñar sen tropezar co seu propio corpo. Non pode reter na memoria. Non pode, en definitiva, desfacer os nós que hai nas conexións do seu cerebro.

Iván é precioso. Ten cara de anxo. Hai un efecto de serenidade que o envolve.

Cada vez que o vemos, mamá e eu sorrímoslle, pero estamos tristes por dentro. Hai días que Iván tampouco sorrí. Na gorxa fáisenos un nó e damos moitos pasos sen falar, porque se nos atragoan as palabras. Como lle pasa a el. Pero de maneira distinta.

Eu tampouco podo estirar de todo o sorriso.


"

Arquivado en:
Colaboradores/as