FADEMGA Plena inclusión Galicia ven de adaptar a lectura fácil o 'Plan Galego de Vacinación fronte á COVID-19', co obxectivo de  facer accesible esta información ás persoas con maiores dificultades de comprensión.

O documento explica a que persoas vacinarán primeiro ou en que consiste a vacina e inclúe respostas a preguntas frecuentes como: por que é importante vacinarse? é obrigatorio vacinarse? ou, ten efectos secundarios a vacina?

Así mesmo, o devandito documento foi revisado polo grupo de validadores con discapacidade intelectual da Federación para garantir que a información fose axeitada para persoas con diferentes niveis de comprensión lectora.

A lectura fácil é unha metodoloxía parar crear documentos máis fáciles de entender, que beneficia a todas as persoas, pero é aínda máis necesaria para persoas con dificultades de comprensión como as persoas con discapacidade intelectual ou do desenvolvemento, maiores con deterioro cognitivo ou persoas con problemas de saúde mental.