© INE | 28/12/2018 | Defuncións por doenzas cerebrovasculares
Os accidentes cerebrovasculares son a primeira causa de morte en Galicia
Cifra referida á poboación xeral e ás mulleres; no caso dos homes, a principal son os tumores de pulmón.
O Instituto Nacional de Estadística (INE) facía pública a semana pasada a última enquisa de 'Defuncións segundo a causa de morte', baseada nos datos de mortalidade do ano 2017. En Galicia producíronse o ano pasado 31.962 defuncións, e as doenzas cerebrovasculares (entre as que se atopa o ictus) resultaron ser a primeira causa de mortalidade.
As enfermidades cerebrovasculares causaron en 2017 en Galicia 2.179 defuncións, 1.338 de mulleres e 841 de homes, situándose como primeira causa de morte. Sen embargo, no caso dos homes, a primeira causa de morte son os tumores malignos da tráquea, dos bronquios e do pulmón. Produciron un total de 1.563 mortes, das que 1.225 foron de homes e 338 de mulleres.
No total estatal, as doenzas cerebrovasculares son tamén a primeira causa de mortalidade en mulleres (15.382 falecementos dun total de 26.937), se ben, en termos globais, as doenzas isquémicas do corazón resultan ser a principal causa de defunción, cun total de 32.325 falecementos (19.32 homes e 13.193 mulleres).
E enquisa do INE presenta tamén as causas agrupadas en epígrafes maiores; atendendo a eles, no 2017 en Galicia as mortes por tumores ascenderon a 8.692, mentres que as causadas por doenzas do sistema circulatorio -entre as que se atopan as motivadas por accidentes cerebrovasculares- chegan a 9.677.
Outras causas de dano cerebral adquirido
Relacionadas cos accidentes cerebrovasculares, como factor de risco dos mesmos, atópanse as doenzas hipertensivas e a diabetes. Estas doenzas tamén supoñen unha causa de morte por si mesmas. no 2017 faleceron en Galicia 876 perosas por doenzas hipertensivas (609 mulleres e 267 homes), mentres que 595 perderon a vida por causa da diabetes mellitus (332 mulleres e 263 homes).
Os accidentes de tráfico causaron 136 mortes (96 homes e 40 mulleres), e as caídas accidentais 397 falecementos (200 mulleres e 197 homes). Ambos factores son dos principais causantes de traumatismos cranioencefálicos que, á súa vez, provocan dano cerebral adquirido.
Como terceira causa do DCA sitúanse os tumores cerebrais. Os tumores malignos do encéfalo causaron 195 falecementos, menres que o capítulo de "outros tumores malignos neurolóxicos e endocrinos" recolle unha cifra total de 50 mortes.
No apartado sobre o ictus da nosa páxina web pódense consultar os gráficos. Tamén hai máis información sobre as causas do dano cerebral. Ademais, esta información do INE analiza os principais datos da enquisa.
