1 de 1
© FEGADACE | 30/05/2023 | Carreira e Andaina #PoloDanoCerebral (Lalín, 02/07/2023)
Aberta a inscrición na II Carreira e Andaina Solidaria Camiñando #PoloDanoCerebral
A proba vai ter lugar en Lalín o domingo 2 de xullo e está aberta a categorías absoluta e escolares.
A Carreira e Andaina Solidaria ‘Camiñando Polo Dano Cerebral’ volve en 2023 para dar continuidade ao labor que realiza a Federación Galega de Dano Cerebral (FEGADACE) para a promoción duns hábitos de vida saudables -que pasan necesariamente por evitar o sedentarismo-, promovendo a organización de actividades deportivas para todas as idades.
Nesta ocasión a cita vai ser no quilómetro cero de Galicia, Lalín, o domingo 2 de xullo. A cita deportiva solidaria co colectivo do dano cerebral adquirido volve contar este ano coas modalidades de carreira e de andaina, e está aberta tanto a persoas adultas como a todas as categorías escolares. Unha vez máis, a proba deportiva de FEGADACE está inserida no calendario oficial da Federación Galega de Atletismo, onde se pode consultar o regulamento.
A inscrición está xa aberta en www.carreirasgalegas.org (poderá tramitarse ata o xoves 29 de xuño ás 23:59 hh.). No mesmo enderezo é posible realizar xa unha doazón ao Dorsal 0, para aquelas persoas que non vaian poder asistir. O evento comeza ás 09:15 coa apertura das mesas de recollida de dorsais e o servizo de gardarroupa.
As modalidades de inscrición, xunto cos seus prezos, distancias e importes, son as que seguen:
| PROBA | HORA SAÍDA | KM | PREZO | AGASALLOS |
| Absoluta 10 km (>16 anos) | 10:00 | 10 km | 10 € |
Camiseta Trofeos para os/as tres primeiros/as atletas, nas categorías feminina e masculina |
| Absoluta 5 km (>16 anos) | 10:00 | 5 km | 5 € |
Camiseta Trofeos para os/as tres primeiros/as atletas, nas categorías feminina e masculina |
| Escolares Sub16 | 10:00 | 5 km | 5 € |
Camiseta Trofeos para os/as tres primeiros/as atletas, nas categorías feminina e masculina |
| Escolares Sub14 + Sub 12 | 11:35 | 800 m | 2 € | Medalla |
| Escolares Sub10 | 11:35 | 250 m | 2 € | Medalla |
| Pitufos + Chupetes (<7 anos) | 11:35 | 100 m | 2 € | Medalla |
| Andaina (>16 anos) | 11:30 | 7 km | 5 € | Camiseta |
| Andaina (<16 anos) | 11:30 | 7 km | 0 € | Medalla |
O lugar de saída e meta de todas as probas é a Praza de Galicia, fronte o edificio do Concello de Lalín. Alí mesmo estará situada a secretaría da competición, lugar da recollida de dorsais e agasallos. As persoas participantes poderán recoller o seu dorsal desde as 09:15 ata 15 minutos antes de cada proba.
Na mesma área situarase o posto de entrega de avituallamento, sólido e líquido, que se ofrecerá a todas e todos os participantes ao seu paso por meta.
A Federación Galega de Dano Cerebral promove e organiza esta proba, contando coa colaboración da Sociedade Deportiva Compostela-Tambre-Lengüelle e do centro Encuentra tu Potencial, e co apoio da Federación Galega de Atletismo e do Concello de Lalín.
Deporte e dano cerebral adquirido
A Federación Galega de Dano Cerebral xa organizou en 2021 un Trail e Andaina Solidaria, e a I Carreira e Andaina Solidaria Camiñando Polo Dano Cerebral en 2022. A promoción duns hábitos de vida saudable é unha prioridade para FEGADACE, principalmente por dous motivos:
- A prevención do dano cerebral adquirido, xa que a práctica de exercicio, unha dieta equilibrada e, en definitiva, unha vida sa, axudan a evitar o ictus. Esta é a principal causa do dano cerebral, e conta entre os seus factores de risco coa obesidade, o sedentarismo, a diabetes ou o estrés.
- A prevención de situacións de dependencia, ou de que estas se agudicen, no caso das persoas con dano cerebral adquirido. Un bo ton físico axuda a manter a autonomía persoal e reforzar a autoestima.
Segue toda a información en #PoloDanoCerebral!
