© FEGADACE | 13/06/2019 | Mª Jesús Lage, unha das protagonistas da exposición 'Punto e seguido'

'Punto e seguido' continúa na sala Apo'strophe.arte de Vigo ata o 3 de xullo

Na presentación falaron Luciano Fernández, presidente de FEGADACE, e Mª Jesús Lage, usuaria de Alento.

Esta mañá presentouse en Vigo a mostra 'Punto e seguido. A vida despois do dano cerebral adquirido'. A colección de fotografías pode visitarse na galería Apo'strophe.arte, no Centro Comercial Plaza Elíptica, ata o 3 de xullo.

No acto participaron Gracinda Pampillón, a presidenta de Alento, e Luciano Fernández, o presidente de FEGADACE, que agradeceron á sala, aos financiadores da mostra e, sobre todo, ás persoas con dano cerebral, "verdadeiras protagonistas", a súa implicación no proxecto.

Pechou a presentación Mª Jesús Lage, usuaria de Alento e unha das protagonistas da exposición e tamén do vídeo 'Punto e seguido', contando a súa experiencia coa chegada do dano cerebral adquirido.

Ademais, proxectouse o vídeo de Alento, coas intervencións de Mª Jesús, da súa parella, Pastora Acuña, e da traballadora social da entidade, Alba Fernández. Xuntas compoñen unha realidade que evidencia a carencia de axudas e recursos existentes actualmente para as persoas con DCA.

No marco do proxecto 'Punto e seguido', ademais da colección de fotografías e da curtametraxe principal, de sete minutos, elaboráronse pequenos vídeos de cada unha das asociacións, nos que se afonda máis detalladamente en cada un dos casos das persoas con dano cerebral protagonistas.